ଅନଲାଇନ ଶିକ୍ଷା, Online Education

ଅନଲାଇନ ଶିକ୍ଷା

ଭୋଳାଶଙ୍କର ସେଠୀ

ଶ୍ରେଣୀ ଗୃହ ଶିକ୍ଷା ଅଫଲାଇନ୍ ପରିକ୍ଷା ଗୁରୁ ବେତ ଥିଲା ଡ଼ର,

ଗୁଗଲ୍ ମିଟ୍ ରୁମ୍ ଲାଗେ ମୁନ୍ ସୁନ୍ ଶ୍ରେଣୀ ଗୃହ ବେଡ୍ ଘର । 

କଳା ପଟା ର ଏ ନବକଳେବର ଧଳା ରଙ୍ଗ ଦେହେ ବୋଳି,

ଏକ ବର୍ଣ୍ଣ ର ସେ ସ୍କୁଲ୍ ୟୁନିଫର୍ମ ଦିଶେ ନାଲି ରଙ୍ଗ ନେଳି ।

ବହି ଖାତା ସବୁ ପଡ଼ି ରହି ଅଛି ଖବର କାଗଜ ପରି,

କଲମ ର କାଳି କଠିନ ହେଲାଣି ଚାଲିବ ଅବା କିପରି?

ହାତେ ମୋବାଇଲି ମନ ବୁଲେ ଦିଲ୍ଲୀ ପାଠ ସବୁ ବୁଝି ଗଲି,

ଅଧା ଅଧି ପାଠ ମିଶାଇ ଗଣିତ ଥିବା ଜ୍ଞାନ ଭୁଲି ଗଲି ।

ରୋଷେଇ ଶାଳ ମୋ ପାଇଁ ଲାବ୍ରୋଟେରି ପ୍ରାକ୍ଟିକାଲ୍ ଏ ବିଜ୍ଞାନ,

ଏକ୍ସପେରିମେଣ୍ଟ୍ ଥାଳି ଗିନା ଚଟୁ ଭାତ ରୁ କରାଇ ଧାନ ।

ସାହିତ୍ୟ ର ଧାରା ଅଟେ ସ୍ବାଦ ଭରା ଇଂରାଜୀ ବିଦେଶୀ ଭୁତ,

ଜେଜେ ଜେଜେ ମାଆ ଶୁଣି ଏହି ପାଠ ହୋଇ ଗଲେଣି ପଣ୍ଡିତ ।

ପରୀକ୍ଷା ର ଖାତା ଲାଗେ ଦେଖିଲେଖା ବହିର ଜେରେକ୍ସ କପି,

ଜ୍ଞାନ ଆମ ଏତେ ଅଧିକ ହୋଇଲା ଦେଖି ଲେଖୁ ଜାଗା ମାପି । 

ବିନା ଶ୍ରେଣୀ ଗୃହେ ସିଲାବସ୍ ସରେ କମାଣ୍ଡ ଏ ଇନ୍ ପୁଟ୍,

ବିନା ପରିଶ୍ରମେ ମାର୍କ ସବୁ ମିଳେ ବାହାରେ ଆଉଟ୍ ପୁଟ୍ ।

ପରୀକ୍ଷା ର ଚାପ ଆରାମ ଦାୟକ ଲାଗେ ନାହିଁ ଟେନ୍-ସନ,

ମୋବାଇଲ୍ ଡାଟା ପାଇଁ ବଢ଼େ ଚିନ୍ତା ନାହିଁ ଯାର ସଲ୍ୟୁସନ ।

ଆଧୁନିକ ଯୁଗେ ଆବିର୍ଭାବ ସେହି ମନସ୍ତତ୍ତ୍ୱ ରୂପ ନେଇ,

ମନ ଭାବନା କୁ ମନ ସାଥେ ଯୋଡ଼େ ଇଣ୍ଟରନେଟ୍ ବୋଲାଇ ।

ଅଶିକ୍ଷିତ ଲାଗି ସାଜଇ ଜଟିଳ ଶିକ୍ଷିତ ପାଇଁ ସରଳ,

କାର୍ଯ୍ୟ କେତେ ବଡ଼ ହୋଇଲେ କଠିନ କରି ଦିଅଇ ତରଳ ।

କମେ ଶାରୀରିକ ମାନସିକ ଚାପ ଦିଅଇ ମନୋରଞ୍ଜନ,

ବାଣିଜ୍ୟ ବିଜ୍ଞାନ ଦିଏ କଳା ଜ୍ଞାନ ବୈଷୟିକ କୁ ଜୀବନ ।